Erin Daen Hithaeglir
Sa uial en-aur, dan ú-thiant Anor. Ar ring im i daen, ring sui ne thrîw.
Ereb i hûl brestant loss ar echant gaint uir-eden. Tailf e-heleg thiliant 'lan
a dhínen. In imlaid thianner sui iâ e-dúath. Na vedui lastannen nad nedh dhîn;
tâd edain i mudasser amvaded i orod, benn ar bess nith.
Darel, i vess bent nan benn: 'Daro, boe darthad enni, Edryn.'
'Mae, Gwendolyn. Dan ú-balan nan ambrand i-thaen.'
'Tiro in imlaid 'aladhremmin nuin gwath en-fuin. Ar hîth gelebren en-aur. Bain.'
'Mae. Dan pelin cened osp ar noer nan mbar vîn. In yrch narthar gair en-gwaith vîn.'
'Uireb i ndeigor drastar hîdh en-amar. Man lû telitha i meth i-ndeigor hin?'
'Ae hirim i naid i aníram nan daen hen, telitha i veth aen. Amvedim ad?'
'Tolem nan had hen a chired i ngolu thurin in-eryd, dan gerin drass.'
'Garo estel, Gwendolyn! Hiritham.', pent Edryn a adcheriant baded.
Amvadel Gwendolyn rent 'irel i nagor ngortheb neder oer io.
Na vinui toler siniath o gebil ú-belain na Ordd, bâr dîn, aphadol toler
edain chernennin i mronner i auth in yrch anglennol. Nan meth taul
gwanod in edhil a thoged dulu in edain.
Gwendolyn rent i nîf alfirin in edhil, gael sui Anor. Pennir nan ierwain Ordd,
pennir o hauth ar o duir e-duath o amrûn, o nguldur ar o neigor in edhil
dan i thuir hin. Ar edain od Ordd mabanner 'rynd, ich ar naim am maethad dan i chyth
anglennol. Nan meth glamhoth doler o thalath. Cíniel in yrch
in edain od Ordd darthanner dholen.
Ar Gwendolyn rent i dharthad. Aul. Gostol darthant, min gaim vagol iaur,
ú-bolel maethad. Auriel elleth taul ar pent bith en estel, dan
Gwendolyn hen ú-lastant.
Nan meth in yrch doler. Pilin revianner, ar lastant 'lam a nallad e-hernennin.
Bragol Auriel vaethant, a Gwendolyn ú-'arn lû nauthad. Orthant i vagol în
ar i amar thiant sui ael en-iâr.
Gwendolyn ú-rent i nagor, dan rent Auriel dangen, i nîf dîn main alfirin 'waur
mi moth. Ar mellyn rim firianner. Berianner Ordd hi, dan istas yrch errim telithar
aen.
Ned aur aphadol gwaith bain govanner min gar en-einior in edain an athrabeth.
Dan pídiel o naid rim ú-chirianner nangweth. Na vedui Gwendolyn, Edryn a gwanod
dithen in gwaith bennir na Morvyn, bess idhren, i guiant ereb min dawar.
Nef fuin anglenner i gar dithen garel daus.
'Ce farn rim.', lastanner i lam Morvyn e char. 'Ereb neled pelir minnad.'
Ar ereb Gwendolyn a tâd biss verthanner minnad. Min gar
nostanner helaib a osp aer. 'Amman tolech?' Morvyn bent.
'Tolem al lastad man pelim cared ae in yrch athelithar.', pent Gwendolyn.
Morvyn dharthanner nauthol. 'I thuir in-eryd istar nangweth aen.',
pent lhossui. Tolthant galph ar cent nan nen dhûr.
Gwendolyn dharthant. Na vedui Morvyn bent na lam brestannen:
'Io anann i thuir in-eryd berianner i 'waith vîn. Dan sír ú-cheniam
in eryd, ú-amvedim i thaen ar ú-lastam i lam i-sern. Boe echaded 'wain
i 'wedh iaur ammen. Boe baded nan ambrand i-thaen.'
'Man berthatha baded?', pent Rhianna. 'Si ethuil, delib idh raith
ar ae amvedim hi pen fîr aen.' - 'Dan boe baded hi.', Morvyn bent.
'Nan daen túliel, man boe cared?', pent Rhianna. 'ú-iston.', Morvyn bent.
'úvan ista. Hirithach ennas.'
Caun Edryn meth idhor Gwendolyn o naid 'wainn. O thaen ovras e-loss
dannant. Lagor Gwendolyn i raph în tangant nan gond. Mathant loss ring
ar hûl danc i rithant hen nan iâ. Bragol i raph narchannen. Na 'alu gant harn
a bronnen i loss dhannol. Giriel cent nan nûr.
'Ce harnen?', pent Edryn or sen. 'ú-charnen.', aun i nangweth.
'Dan goston. Ae ú-nallannech aen, dannen. Sui Olwen dannant.'
Gwendolyn rent dhant Olwen ned enedh en-fuin. Nallant thent, aphadol
am 'land en-iâ gwannant. Ereb loss dhinen dannant ú-brestannen.
Tâd adbanner am.
Garel loss ring nan lebid în na vedui toler nan ambrand i-thaen. Anor ú-orthant,
dan aur anglennant lagor. Edryn gent nan gâw e-heleg ar e-loss.
'Si úvan!', nallant. 'Man boe cared hi ammen? Tolem nan had hen,
Olwen firiant, dan hirim ereb loss! Mas i lam i-sern?'
Gwendolyn dharthant, i rainc în girnir. Aníriant lostad an uir, a
nallad Edryn thiant ben-ind. Mathant i loss ring nuin dail în. Anor
víthant i 'land Amar, ar taen belain thiliant na aur vinui. Ar bragol
mathant îdh chall ar hîdh.
'ú-cheniach, Edryn?', pent Gwendolyn.
'In eryd uireb, yrch a cyth o Thrûn hain ú-drastar. I galad Anor, i
thiliad e-loss - i dhúath ú-bôl orthored hain - bronathar.'
'Dan gwaith ú-vronathar, Gwendolyn. Gwaith vín firithar, ir in yrch telir.'
'Boe geliad i ngolu in-eryd an gwaith vín. Ir in yrch anglennar, boe
baded na imlaid dhelin. Ennas in eryd veriathar ven. Boe gwaith
vín sui eryd - i loss dhanna ned thrîw, i loss 'wanna ned laer, dan
ú-drasta in eryd. Yrch an gwaith vín sui loss an eryd.
In yrch ú-drastathar ven ae cerim i naid hin.'
'Sen ben-ind. Yrch ortherithar Ordd ar narthathar naur veleg.'
'Narthathar. Dan ú-ortherithar 'waith Ordd.'
'Sin i phith en eryd i lastad tolem?'
'Mae, Edryn. Si henion i lam in eryd.'
Ar aphadol bennir dadbenn, tâd edain brestennin, dan ereb
Gwendolyn 'arel estel.
Meth.
See the English text
Back to the index